ARCHERS VS SKIPPERS SA D-LEAGUE FINALS

Laro sa Linggo:
(Smart Araneta Coliseum)
Game 1, Best-of-3 Finals
12 p.m. – Marinerong Pilipino vs EcoOil-La Salle

NAISAAYOS ng Marinerong Pilipino at EcoOil-La Salle ang title showdown sa 2022 PBA D-League Aspirants’ Cup makaraang dispatsahin ang kani-kanilang katunggali kahapon sa Araneta Coliseum.

Nag-init si Juan Gomez de Liano sa tamang pagkakataon para sa Skippers sa kanilang 69-64 panalo kontra top seed Apex Fuel-San Sebastian, habang maagang nag-warm up si CJ Austria upang pangunahan ang Green Archers sa magaan na 97-74 panalo kontra Adalem Construction-St. Clare.

Nagpasabog si Gomez de Liano, ang Gilas Pilipinas guard, ng 8 points sa huling 3:01 ng laro, umiskor ng back-to-back triples bago ang insurance layup, may 52.4 segundo ang nalalabi upang palobohin ang kalamangan ng Marinerong Pilipino sa apat, 66-62.

Naitala ni Arvin Gamboa ang huling tatlong puntos, kabilang ang game-sealing undergoal stab sa huling 12.5 segundo para sa ikalawang sunod na Finals appearance ng Marinerong Pilipino.

“It was really all about our team mindset,” sabi ni Gomez de Liano, na nanguna sa Skippers na may 23 points, 8 rebounds, at 6 assists sa clincher. “We just had the right mindset coming into this do-or-die game.”

Samantala, naiposte ni Austria ang 19 sa kanyang 26 points sa first half kung saan kumarera ang EcoOil-La Salle sa 52-40 lead sa half at hindi na lumingon pa. Napalobo nila ang bentahe sa hanggang 27, 75-48, sa huling bahagi ng third frame.

Kumubra rin si Austria ng 5 rebounds at 3 assists. “I’m really happy and satisfied with the way we played. The boys just played really hard today and the things we were supposed to do last time around, we did it right today,” sabi ni coach Derick Pumaren.

Iskor:
Unang laro:
EcoOil-La Salle (97) — Austria 26, Quiambao 16, M. Phillips 14, Nelle 7, Winston 7, Escandor 7, Nwankwo 5, Buensalida 4, Estacio 3, Blanco 3, Cortez 3, B. Phillips 2, Manuel 0.
Adalem-St. Clare (74) — Rojas 17, Fontanilla 16, Sablan 12, Estrada 10, Ndong 8, Estacio 4, Sumagaysay 4, Galang 3, Lopez 0, Gamboa 0, Manacho 0.
QS: 22-20, 52-40, 78-54, 97-74.
Ikalawang laro:
Marinerong Pilipino (69) — Gomez de Liano 23, Soberano 14, Go 11, Bonifacio 7, Carino 6, Nocum 4, Gamboa 3, Manlangit 1, Pido 0, Bonsubre 0, Agustin 0.
Apex Fuel-San Sebastian (64) — Calahat 19, Sumoda 15, Villapando 12, Desoyo 6, Felebrico 6, Altamirano 3, Escobido 3, Are 0, Yambing 0, Shanoda 0, Cosari 0, Una 0.
QS: 7-11, 25-26, 44-43, 69-64.