AGUSAN DEL NORTE – HULI sa akto ng pagbebenta umano ng droga sa drug buy bust operation ng mga kabaro nito, Sabado ng gabi, sa lungsod ng Butuan.
Batay sa report ng pulisya, kinilala ang nadakip na suspek na si Patrolman Mike, nakatalaga sa 1st Provincial Mobile Force Company at residente ng Barangay Tiniwisan Butuan City.
Ayon sa Butuan City Police Station 4, gabi ng Sabado nadakip ang pulis sa nasabing lugar.
Lumabas sa imbestigasyon ng pulisya, nakatanggap sila ng report hinggil sa bentahan ng iligal na droga ng suspek sa nabanggit na lugar.
Agad na inilatag ang operasyon laban sa suspek at aktong nabentahan nito ang mga pulis na nagpanggap na bibili ng shabu.
Kinumpirma naman ni PCol. Rommel Villamor, Police officer-in-charge Butuan City, na ang naturang suspek ay isang AWOL na pulis.
Inihanda na ang mga kasong isasampa laban na suspek at posibleng matanggal ito ng tuluyan sa serbisyo.
EVELYN GARCIA
