BAGONG DISTRICT HOSPITAL, SIMBOLO NG PAG-ASA AT PAGLILINGKOD SA SAN JOSE, TARLAC—MAYOR MAX

SA malayong Barangay Pao ng San Jose, Tarlac, isang makasaysa­yang araw ang naganap sa Mass Oath Taking ng mga bagong miyembro ng Women of Western San Jose (WOW San Jose).

Dito, ipinahayag ni Mayor Max Roxas ang isang pangarap na magbabago sa buhay ng kanyang mga kababayan—ang pagtatayo ng isang District Hospital sa kanilang bayan.

Kasama ni Mayor Roxas sa okasyon si Mayor Cristy Angeles ng Tarlac City, na nanguna sa panunumpa ng mga bagong miyembro ng WOW San Jose.

Ngunit higit pa sa seremonya, sinamanta­la ni Mayor Roxas ang pagkakataong ilahad ang isang adhikaing magpapabuti sa kalusugan at kapakanan ng higit sa 42,000 residente ng San Jose, isang bayan na ma­tagal nang nangangaila­ngan ng sariling pasilidad pangkalusugan.

Ang San Jose, na kilala noon bilang Western Barrio, ay isang liblib na lugar sa Tarlac na madalas malayo sa abot ng mga pangunahing serbisyo ng probinsya.

Sa kabila ng pagiging 3rd class municipality, pinatunayan ni Mayor Roxas na may kakayahan ang San Jose na tumugon sa mga hamon, lalo na kung maayos na magagamit ang likas na yaman nito.

Ayon sa plano, gagamitin ang kita mula sa quarry operations ng Tarlac upang pondohan ang pagtatayo ng District Hospital.

Batid ni Mayor Ro­xas ang potensyal ng kita mula sa quarry, na kung magagamit nang tama at hindi maaabuso ng katiwalian, ay maaaring magbigay ng benepisyo sa buong lalawigan.

“Ang tamang pamamahala sa kita ng quarry ay magbibigay-daan upang matustusan ang pangangailangan ng probinsya. Sa halip na maibulsa, ito ay dapat mapunta sa kapakanan ng mga tao,” ani Roxas.

Ang proyekto ay hindi lamang tungkol sa pagtatayo ng ospital. Ito ay isang patunay ng matibay na hangarin ng liderato ni Mayor Max Roxas na maitaas ang antas ng pamumuhay ng bawat taga-San Jose.

Isang inspirasyon ang kanyang tagumpay bilang Most Outstanding Municipal Mayor sa buong Pilipinas, ayon sa Gawad Pilipino Lingkod Bayan Awards.

Sa kabila ng tropeo at karangalang natanggap, binibigyang-diin ni Mayor Roxas na ang tunay na sukatan ng tagumpay ay ang serbisyong ini­hahatid niya sa kanyang mga kababayan.

Ang pagtatayo ng District Hospital ay isang hakbang patungo sa mas maliwanag na bukas para sa San Jose.

Hindi lamang nito ilalapit ang serbisyong pangkalusugan sa mga tao, kundi ito rin ay magiging simbolo ng pagkakaisa at pagtutulungan sa bayan.

Sa pamamagitan ni Mayor Max, ang San Jose ay hindi na lamang makikilala bilang isang liblib na bayan, kundi bilang isang bayan na may kakayahang magsulong ng progreso para sa lahat.

Aba’y na sa bawat hakbang ng proyekto, malinaw ang mensahe ni Mayor Roxas: ang bawat desisyon, bawat plano, at bawat aksyon ay para sa kapakanan ng kanyang mga kababayan.

Kaya ang District Hospital na itatayo sa San Jose ay hindi lamang isang istraktura, kundi isang patunay ng tunay na malasakit, dedikas­yon, at liderato na mag­hahatid ng pagbabago sa nasabing lugar.