(Bahagi ng AFP modernization) 5 COMBAT CHOPPERS DUMATING NA

DUMATING na ang lima sa  Polish-made Sikorsky S-70-i Black Hawk combat utility helicopters na kasama ng 16 na combat chopper na binili ng Defense Department para sa Philippine Air Force sakay ng higanteng Antonov  cargo plane.

Ito ang kinumpirma kahapon ni  Defense Secretary Delfin Lorenzana kaugnay sa delivery ng unang anim na Black Hawk helicopters na nakapaloob sa second horizon ng AFP modernization program.

Nabatid na dahil limang choppers lang ang kasya sa nasabing cargo aircraft na nag-deliver kamakalawa ng hapon sa Clark  Air Base  ay isinakay na lamang sa barko ang ika-anim na helicopter at inaasahang darating ito ngayong buwan ngDisyembre.

“Yes, the five arrived in Clark (Airbase in Angeles City, Pampanga)  aboard an Antonov heavy  transport plane (An-124) The sixth was loaded on a ship that will arrive on December 2,”ani Lorenzana.

Napag alaman na ang  16 helicopters na binili mula sa Polish company na Polskie Zaklady Lotnicze Sp.z.o.o, ay under  license ng  Sikorsky USA at may contract price na umaabot sa US$241,461,699.39 na isinagawa sa pamamagitan ng government-to-government transaction.

Sa ibinahaging impormasyon ng DND, ang  An-124 heavy transport ay umalis ng Rzescow-Jasionka Airport, Poland noong  Nobyembre 7 at dumating ng Clark Air Base noong Lunes ng gabi.

Napag -alaman din na walang pang formal acceptance sa naunang anim na choppers dahil kailangang sumailalim pa ang mga ito  pagsusuri ng PAF service at kanilang unit assignment.

Inihayag naman ni  DND spokesperson Arsenio Andolong na  ang nalalabing 10 units ng  Polish-made S-70i Black Hawks ay ihahatid sa mga unang buwan ng  2021.

Ang  Black Hawk, ay tinuturing na medium transport helicopter na may kapasidad na lumipad sa bilis na 224mph/361kph at may  range na umaabot sa 290 miles /460 kilometers.

Ipinagmalaki ni Andolong na higit na mapapalakas ng idedeliver na  S-70i  ang capabilities ng  AFP sa pagsasagawa ng iba’t ibang military operations kasama na rito ang  humanitarian  assistance at disaster response, at tulong sa pamahalaan sa paglaban sa COVID-19 pandemic. VERLIN RUIZ