BANTAI COVID, PALALAWAKIN PARA PROTEKTAHAN ANG COVID PATIENTS, HEALTH WORKERS -EXPERT

INAASAHANG mas mapapalawak at maraming matutulungan sa sistemang BantAI Covid at BantAI Vax sa mga darating pang buwan.

Ito ang pagmamalaki ni Dr. Loysa Orense, administrator at project lead ng BantAI Covid kung saan nai-adopt ngayon sa Quezon City.

Sa ginanap na weekly Report to the Nation media forum ng National Press Club, sinabi nito na nananatiling organisado at maayos ang sistema ng kanilang pagtugon sa mga kaso ng Covid-19 sa lungsod kung kayat mabilisang natutugunan ang mga tumatawag sa kanilang programa online.

Aniya, pawang volunteer doctors ang nagtutulong tulong para maibsan ang mga kaso ng Covid-19 katuwang ang lokal na pamahalaan ng QC sa pagresponde ng mga nasabing kaso.

Binuo aniya ang programang BantAI Covid upang maproteksyunan ang mga kapwa health workers o frontliners sa humaharap sa mga pasyenteng nagtataglay ng nasabing nakahahawang sakit.

Marami na aniya ang mga doktor na nagsakripisyo’t nagbuwis ng buhay dulot ng sakit na Covid-19 kung kayat ang kanilang hanay ay nagkusang tumulong nang walang anumang kapalit mabigyan lamang ng proteksyon ang mga kapwa doktor na unti unting namamatay simula pa ng nagdaang taon.

“Pagod na pagod na kami at gusto na naming maluha sa tuwing nakikita namin na may naghihingalo at pumapanaw na pasyente sa mga ospital,” saad pa ni Dr. Orense na siyang nasa likod at abala sa naturang programa.

Sa pamamagitan aniya nito ay mas palalawakin ang programa kung saan kahapon lamang ay nakipagpulong sila kay Baguio City Mayor Benjamin Magalong upang mai-adopt maging sa naturang siyudad ang nasabing sistema para maiwasan ang pagkalagas ng mga pasyente’t doktor gayundin ay matugunan din ng tama ang marami pang kaso ng Covid-19 sa bansa. BENEDICT ABAYGAR, JR.