SA kulungan bumagsak ang anim na hinihinalang drug personalities, kabilang ang isang barbero na tulak ng illegal na droga matapos malambat ng pulisya sa isinagawang buy-bust operation sa Navotas City, kamakalawa ng gabi.
Kinilala ni Navotas police chief P/Col. Allan Umipig ang naarestong mga suspek na sina alyas “Cris”, 50, barbero; alyas “Oneg”, 27; “Rigor”, 40, kapwa ng Malabon City, Ian S, 29, welder; alyas “Edie Boy”, 36, at alyas “Nognog”, 35, pawang ng Navotas City.
Sa ulat ni Col. Umipig kay Northern Police District (NPD) Director P/BGen Ponce Rogelio Peñones Jr, nakatanggap ang mga operatiba ng Station Drug Enforcement Unit (SDEU) ng impormasyon mula sa isang Regular Confidential Informant (RCI) hinggil sa illegal drug activities ng suspek kaya isinailalim siya sa validation at surveillance operation
Nang positibo ang ulat, agad ikinasa ng mga operatiba ng SDEU sa pangunguna ni P/Cpt Luis Rufo Jr, ang buy bust operation sa kontra sa suspek sa Sampaguita St., Brgy. Tanza I, dakong alas-7:24 ng gabi kung saan isang undercover police ang nagawang makipagtransaksyon sa kanya ng P500 halaga ng shabu.
Nakumpiska sa mga suspek ang anim heat-sealed transparent plastic sachets na naglalaman ng nasa 20 grams ng hinihinalang shabu na may standard drug price (SDP) value na P136,000.00, buy bust money at ilang drug paraphernalias.
EVELYN GARCIA