BASILAN NAKAUNA SA MANDAUE

DOMINANTE sa kabuuan ng laro ang Jumbo Plastic-Basilan tungo sa tambak na 94-67 panalo laban sa Visayas champion KCS Mandaue sa Game 1 ng 2021 Chooks-to-Go Pilipinas VisMin Super Cup best-of-five Southern Finals, Miyerkoles ng gabi sa Pagadian City Gymnasium sa Zamboanga del Sur.

Hataw ang Mindanao leg champion Peace Riders sa double digit na bentahe sa kabuuan ng laban para maitakas ang impresibong  panalo kontra Computer Specialists at hilahin ang winning run sa 12-0, kabilang ang sweep sa leg conference ng kauna-unahang professional basketball league sa South.

“Noong first half, we couldn’t pull away kasi on some plays disorganized kami sa executions. Sinabihan ko lang sila na just follow the pattern sa executions at mas tigasan pa ang depensa,”  pahayag ni Basilan head coach Jerson Cabiltes.

Mula sa 44-31 halftime lead, nahila ng Basilan ang bentahe sa  26 puntos mula sa 16-3 scoring run, tampok ang jumper ni Michael Mabulac para sa 60-35 talaan, may 6:15 ang nalalabi sa third period.

Hindi na nagawang makaporma ng Mandaue at sa dalawang free throws ni Jong Baloria ay naitarak ang pinakamama-laking bentahe na 36 puntos, 86-50, tungo sa huling anim na minuto ng laro.

Ratsada si Mindanao Leg Finals MVP Chris Bitoon sa Basilan sa kinamadang 19 puntos, tatlong assists, at dalawang steals, habang kumana si Baloria ng 13 puntos, pitong  rebounds, at tatlong assists, at tumipa si Michael Mabulac ng 11 puntos at anim na rebounds.

Nanguna si Steve Castro sa KCS na may 18 puntos, habang kumana si Miguel Gastador ng 11 puntos.

Target ng Mandaue na makabawi sa Basilan sa Game 2 na nilalaro hanggang press time. EDWIN ROLLON

Iskor:

Basilan (94) – Bitoon 19, Baloria 13, Mabulac 11, Balucanag 10, Manalang 10, Juico 10, Bringas 6, Hallare 6, Gabo 5, Collado 2, Taganas 2, Uyloan 0, Saliddin 0, Tan 0, Siruma 0.

Mandaue (67) – Castro 18, Gastador 11, Soliva 6, Sorela 6, Cachuela 6, Nalos 5, Bregondo 5, Roncal 3, Bautista 3, Dela-tor 2, Imperial 2, Octobre 0, Mercader 0.

QS: 24-11, 44-31, 75-46, 94-76.

Related posts:

BASILAN HARI SA VISMIN SUPER CUP MANDAUE KAMPEON SA VISAYAS LEG NG VISMIN CUP BASILAN DUMIKIT SA VISMIN CUP TITLE BASILAN LUMAPIT SA KORONA FIRST ROUND SWEEP TARGET NG TALISAY GAME 1: TALISAY VS MANDAUE PAGADIAN RATSADA SA IKA-3 SUNOD NA PANALO BASILAN RATSADA SA VISMIN CUP MINDA LEG