NAIPAGPATULOY ng Meralco at NLEX ang kanilang perfect runs sa 2023 Batang PBA nitong Miyerkoles sa Ynares Sports Arena.
Umiskor si Isaac Miguel Purugganan ng 14 points para sa Batang Meralco Bolts na pinataob ang Batang Phoenix Fuel Masters, 67-41, habang nagtala rin si Lino Tubongbanua, Jr. ng 14 upang pangunahan ang Batang Road Warriors sa 69-65 comeback win laban sa NorthPort Batang Pier.
Nanatiling walang talo ang Meralco sa Group D ng 12-Under division sa kanilanh ikatlong sunod na panalo, ang parehong record ng NLEX sa Group A ng 14-Under division.
Nahulog ang Phoenix at Northport sa 1-2 at 1-3 kartada sa kani-kanilang pools.
Sa iba pang 12-Under matches, ginapi ng Converge ang Northport, 65-57, habang ibinasura ng Magnolia ang PBA Stalwarts, 55-26.
Nagbuhos si Son Yu ng 27 points para sa Batang FiberXers, na naiposte ang kanilang ikalawang sunod na panalo sa Group D para sa 2-1 marka.
Sumandal ang Batang Hotshots sa 10 points ni Rashad Jamir Bautista upang maitala ang kanilang unang panalo sa tatlong laro sa Group B.
Nanatiling walang panalo ang NorthPort sa 0-4 habang nahulog ang PBA Stalwarts sa 1-3.
