BATANG PINOY STANDOUTS LUMANGOY NG BRONZE SA 11TH ASIAN AGE GROUP CHAMPIONSHIPS

NAKOPO ng Pilipinas ang unang medalya nito sa 11th Asian Age Group Championships makaraang angkinin nina Heather White at  Jamesray Mishael Ajido ang third place sa kani-kanilang  events noong Martes ng gabi sa New Clark City Aquatics Center sa Capas, Tarlac.

Nilangoy nina White at  Ajido ang bronze medals sa Girls’ 15-17 100-meter Butterfly at Boys’ 12-14 50-meter Freestyle events, ayon sa pagkakasunod.

Sina White at Ajido ay kapwa standouts ng Batang Pinoy National Championships na idinaos sa Rizal Memorial Sports Complex sa Manila noong December 17-22 ng nakaraang taon.

Si White, 16, ay humakot ng 7 gold medals sa flagship grassroots project ng PSC sa ilalim ng banner ng Parañaque City. Si   Ajido, kinatawan ang Mandaluyong City, ang  most bemedalled athlete ng kanyang class.

“I am proud that the Philippines finally made it to the medal mark in this tournament. Congratulations to all our national athletes, this kind of tournament is a great instrument to further improve in the sport,” sabi ni Philippine Sports Commission Chairman Richard Bachmann.

Dumalo sina Chairman Bachmann at Commissioner Matthew ‘Fritz’ Gaston sa ikatlong araw ng torneo upanh suportahan ang 44 Filipino tankers na sumasabak.

CLYDE MARIANO