BAWAS-SINGIL SA TUBIG SASALUBONG SA OKTUBRE

MAKAAASA ang mga customer sa Metro Manila ng mas mababang singil sa tubig sa mga susunod na buwan.

Ito ay makaraang aprubahan ng Metropolitan Waterworks and Sewerage System (MWSS) ang quarterly adjustment para sa concessionaires Maynilad Water Services Inc. at Manila Water Company Inc.

Batay sa inilabas na abiso ng MWSS, aarangkada ang bawas-presyo sa Oktubre 1.

Inaasahang bababa ng P0.78 kada buwan ang water bills ng residential customers ng Manila Water na kumokonsumo ng 10 cubic meters o mas mababa.

Ang mga kumokonsumo naman ng 20 cubic meters kada buwan at 30 cubic meters kada buwan ay may bawas na P1.73 at P3.52, ayon sa pagka-kasunod.

Samantala, ang residential customers ng Maynilad na kumokonsumo ng  10 cubic meters o mas mababa ay inaasahang may bawas sa kanilang water bills ng P0.06.

Ang mga kumokonsumo naman ng 20 cubic meters kada buwan at 30 cubic meters kada buwan ay inaasahang may bawas na P0.24 at P0.50, ayon sa pagkakasunod.