(Bawas-work load sa mga guro) 5K DEPED WORKERS WANTED

PLANO ng Department of Education (DepEd) na dagdagan ang mga non-teaching position sa mga pampublikong paaralan sa bansa.

Sa pahayag ni DepEd  Secretary Leonor Briones, nagpapatuloy na ang kanilang pakikipag- usap sa mga ahensiya ng gobyerno tulad ng Department of Budget and Management (DBM) at Committee of Basic Education and Culture sa  House of Representatives.

Binigyan ang DepEd ngayong  taon  ng 5,000 slots na non-teaching position upang mabawasan na ang  dami ng trabaho ng mga guro.

Sinabi pa ni Briones na mas mainam pa rin  na dagdagan pa ito para sa mga technical at administrative jobs sa lahat ng public schools sa Filipinas.

Iginiit niya na ang 5,000 na slots para sa non-teaching position ay hindi sasapat para sa 47,000  pampublikong eskuwelahan sa bansa.

Ang pagkuha ng non-teaching personnel  ay bahagi rin ng programa upang makapaghatid ng dekalidad na edukasyon para sa lahat.

Ang DepEd ang  isa sa may pinakamalaking bahagi sa  P4.1 trillion national budget bukod sa infrastracture sector.

Matatandaang pinuri ng DepEd ang  Pangulong Duterte at mga mambabatas  sa pag-apruba ng  General Appropriations Act (GAA) for FY 2020.