BIGAS NA P42-45 KADA KILO, AVAILABLE NA SA MGA PAMILIHAN SA NCR – RICE RETAILERS

Magandang balita dahil available at mabibili na sa halos lahat ng pamilihan sa National Capital Region (NCR) ang regular at well-milled rice na nagkakahalaga lamang ng P42 hanggang P45 kada kilo.

Ito ay bunga na rin ng inisyatiba ng administrasyon ni Pangulong Ferdinand “Bongbong” Marcos Jr., na babaan ang taripa ng bigas sa bansa sa 15 porsyento.

Bilang patunay, nabatid na nitong Martes ng umaga ay inimbitahan ng Philippine Rice Industry Stakeholders’ Movement (PRISM), isang mala­king organisasyon ng mga rice traders, si Speaker Ferdinand Martin G. Romualdez at iba pang mambabatas para mag-inspeksyon ng presyo ng bigas sa Guadalupe Market sa Makati, Farmers’ Market at Nepa QMart sa Quezon City.

Kasama ni Speaker sa pag-iikot sa mga naturang pamilihan sina ACT-CIS partylist Reps. Erwin Tulfo at Edvic Yap at Que­zon province Rep. Mark Enverga.

“Inimbitahan po na­min si Speaker (Romu­al­dez) para sa market visit para ipakita sa kanya na lahat ay nagbebenta na ng P42-P45 kada kilo ng bigas.  Ang nakita po namin dito na factor yung pagbaba po ng taripa from 35% to 15%,” ayon kay Orly Panuntag, pangulo ng PRISM.

Dagdag pa niya, “So natutuwa po yung mga retailers natin tsaka yung mga consumers po natin meron silang aasahan ngayon na P42 hanggang P45, ibababa pa po namin.”

Labis namang ikinatuwa ni Speaker ang kapansin-pansin na agarang pagbaba ng presyo ng mga bigas dahil sa pagbaba ng taripa.

“Nag-i-inspect lang tayo, minomonitor natin yung presyo ng mga bigas dito talagang makikita natin ang pagbaba ng pres­yo ng mga bigas sa abot kayang presyo sa masa.  Ito yung programa ng ating President Ferdinand R. Marcos Jr., na abot kaya lahat ng presyo,” pahayag pa ni Romualdez.

Karamihan naman sa mga tindero at may-ari ng bigasan sa mga naturang palengke ay nagpapasalamat sa pamahalaan dahil sa patuloy na pagbaba ng presyo ng bigas sa mga pamilihan.

“Nagpapasalamat po kami at lalo na higit po sa inyong lahat at may dumating na po na mababa,” ayon sa rice trader na si Rey Panganiban.

Pahayag naman ni Arnel Figuro, negos­yante ng bigas sa Farmers’ Market, na simula nang ibaba ang taripa ay na­ging maayos  ang bentahan ngayon ng bigas.

“Sabi ko nga kay Speaker kanina salamat po sa kanila tsaka kay Pangulo natin kay BBM dahil sa tariff na bagong pinalabas nila na 15% na tariff atleast may nakakabangga ang mga importanted yung local natin so nababa…. bumaba yung presyo ng bigas kaya may nakukuha tayo na mura mura sana magtuloy tuloy,” ani Figuro.

Ayon naman kay Elaine Cabildo, “Dahil bumaba nga yung bigas marami kaming pwedeng maioffer na mas mababang bigas kasi nga syempre hirap din sila sa budget kasi nga hindi lang naman bigas ang mahal ngayon.

Kasama ring nag-ikot sa palengke sina DTI Price Control ASec Agaton Uvero, DA Agribusiness and Marketing Assistance Services Asec Bebang Guevarra, at DTI representatives Dir. Fhillip Sawali, Div. Chief Rosita Jaleco at Asst. Div. Chief Joel Buag.