BINATIKOS ng militanteng Pinag-isang Tsuper at Opereytor Nationwide (Piston) ang bigtime oil price hikes na pinatupad kahapon na P1.80 sa diesel at P2.35 kada litro naman sa gasolina.
Ayon kay George San Mateo ng Piston, malaking kalokohan ang rason ng Department of Energy (DOE) na dahil daw sa atake sa Saudi gayong hindi naman bagong bili na stock ang krudo at gasolina na ibinebenta ng oil companies. “Bakit nagtaas agad at naging napakalaki pa,” pahayag ni San Mateo.
Pinababasura nito ang Oil Deregulation law at imbestigahan ang overpricing at pagkakartel ng mga malalaking dayuhang oil companies.
“Panahon na para ipatupad ang regulasyon at unbundling sa pagtatakda ng local oil prices,” saad ni San Mateo.
Kahapon din ng umaga ay nagsagawa ng protesta ang Piston sa Cubao area sa Quezon City bilang pagkondena sa malaking dagdag-presyo nng diesel at gasolina. BENEDICT ABAYGAR, JR.
Comments are closed.