CAMARINES NORTE- ISANG bigtime drug pusher ang napatay sa ikinasang anti Narcotics operation ng kanyang mga tauhan sa Brgy Mancruz, Daet sa lalawigang ito.
Kinilala ang napatay na drug personality na si Merlito Senaon Bayta Jr., 37-anyos , binata ng Barangay San Juan, Baao, Camarines Norte.
Matapos magsagawa ng case build-up at intelligence operation laban sa target personality ay ikinasa ng PNP-PRO5 ODRDO-RPDEU5 team Camarines Norte sa pamumuno ni Cpt. Emil S Yebra katuwang ang mga operatiba ng PPDEU/PIU Camarines Norte PPO, Camarines Norte 1st PMFC at MPDEU DAET MPS, sa pangangasiwa ni Lt. Col. Jerry Alvarez, Chief RPDEU5 ang buy-bust operations sa Brgy. Mancruz.
Kumagat sa pain ang suspek at binentahan nito ng 100 gramo ng shabu ang nagpanggap na poseur buyer kapalit ng P600,000.00.
Subalit, natunugan ng suspek na pulis ang kanyang katransaksyon kaya mabilis itong bumunot ng baril at pinaputukan ang mga papalapit na pulis.
Napilitang gumanti ng putok ang mga operatiba na ikinamatay ng suspek.
Nagawa pang madala si Bayta sa pagamutan subalit idineklara itong dead on arrival ng attending physician.
Sa isinagawang crime scene investigation , bukod sa nakuhang 100 gramo ng shabu ay nakakuha rin ang mga awtoridad ng siyam pang knot tied plastic pouch na naglalamang ng umaabot sa 900 gramo ng shabu na tinatayang may street value na aabot sa P6.8 milyon.
Nasamsam din sa crime scene ang isang unit Taurus PT1911 Caliber45 pistol na may serial number 516258; dalawang pirasong steel magazine para Taurus Caliber 45; ilang live ammunitions para sa cal.45 at mga fired cartridges.
Kasalukuyang bineberipika ngayon ng PNP-PRO5 Intelligence Unit ang report na nagmumula sa Bilibid Prison ang droga na isinu-supply ni Bayta sa mga kalapit lalawigan. Minsan na rin umanong nakulong ang suspek ng dalawang taon nang dahil din sa iligal na droga. VERLIN RUIZ