NUEVA ECIJA-ARESTADO ang 24 na kalalakihan habang 5 ang sugatan sa naganap na barilan sa Purok Gulod Brgy, Concepcion sa bayan ng Gen.Tinio sa lalawigang ito kamakalawa ng gabi.
Base sa paunang imbestigasyon ng mga awtoridad, ganap na alas-11:30 gabi nitong Sabado nang magkasagupa ang bodyguads ni Incumbent Mayor Isidro Pajarillaga at Mayoralty Candidate Virgilio Bote.
Sa report na ipinadala ni Nueva Ecija Provincial Director Col Jesse Mendez kay PRO3 Regional Director BGen. Matthew Baccay, nakatanggap sila ng report kaugnay sa naganap na barilan.
Base sa imbestigasyon ng mga pulis, isang kulay puti na Nissan Navarra at isang Gray Ford Raptor ang kapwa may mga tama ng bala ng baril.
Nabatid na nagkasagupa ang mga tauhan ng dalawang magkatunggaling alkalde na kung saan 5 bodyguards ni Bote ang sugatan at 24 naman umano’y mga bodyguards ni Pajarillaga ang inaresto.
Nakuha sa mga security personnel ni Bote ang isang 12-gauge shotgun,isang caliber .45, habang narekober naman sa mga tauhan ni Pajarillaga ang 5 unit ng M16 rifles, 11 caliber .45 pistols, tatlong 9MM pistols, isang caliber .40 pistol at isang 12-guage shotgun at ibat-ibang uri ng mga bala ng baril.
Nakuha rin sa pinangyarihan ng bakbakan ang 20 cellular phones, 3 handheld radios, campaign leaflets.
Samantala, patuloy naman ang isinasagawang imbestigasyon ng mga pulis kung paano at sino ang unang nagpaputok ng baril. THONY ARCENAL
