KINUMPIRMA ng Department of the Interior and Local Government (DILG) na isang barangay captain lamang ang nagsilbing chairperson ng Protected Area Management Board (PAMB) ang naglabas ng resolusyon sa nagpapahintulot sa isang resort sa Chocolate Hills.
Sa isang press conference sa kanyang isinagawang pagbisita sa Captain’s Peak Resort, sinabi ni DILG Secretary Benhur Abalos na wala ang chairman mula sa Department of Environment and Natural Resources (DENR) sa mga paglilitis.
“Noong nakita ko itong resolution na ginawa, kung hindi ako nagkakamali, wala yung chairman ng DENR. Ang nag-chair ay isang barangay captain. Kaya naipasa itong tungkol sa Captain’s Peak,” ani Abalos.
Ayon kay Abalos, kasama sa organizational structure ng PAMB ang isang pinuno mula sa DENR, isang gobernador, tatlong kinatawan ng distrito, 65 barangay kapitan, at iba pang kinatawan mula sa iba’t ibang ahensya.
Dahil dito, sinabi ni Abalos na titipunin niya ang PAMB sa mga rehiyon para “ma-capacitate” ang mga ito sa tulong ng DENR.
Samantala, sinabi ni Abalos na inililista na ngayon ng DILG ang iba pang protektadong lugar sa bansa upang suriin kung may mga iligal na istruktura din ang itinayo sa mga lugar na ito.
Gumawa ang DILG ng task force para tingnan ang posibleng pananagutan ng mga opisyal ng lokal na pamahalaan sa pagtatayo ng Captain’s Peak Resort sa loob ng protected area ng Chocolate Hills.
Sinabi ng DENR na iniutos nito ang pansamantalang pagsasara ng resort noong Setyembre 2023 at isang Notice of Violation sa project proponent noong Enero 2024 dahil sa operasyon nang walang environmental clearance certificate (ECC).
Noong Marso 13, inanunsyo ng resort ang pansamantalang pagsasara nito sa gitna ng flak sa social media at napipintong aksyon ng gobyerno tungkol sa mga operasyon nito.
EVELYN GARCIA
