BVR ON TOUR: BUBBLE TITLE SWEEP KINA RONDINA-PONS, GARCIA-ARBASTO  

SANTA ANA, Cagayan — Nakumpleto nina Sisi Rondina at Bernadeth Pons ng Creamline 1 ang women’s golden double sa bubble kasunod ng 21-13, 21-11 panalo laban kina Dij Rodriguez at Dzi Gervacio ng Creamline 2 sa BVR on Tour second leg kahapon dito.  

Walang bahid sina Rondina at Pons sa 13 matches sa two-leg bubble at nanalo ng 19 sunod mula pa sa 2019 Lianga leg kung saan namayani rin ang prolific duo.  

 Nakopo rin nina Krung Arbasto at Jude Garcia ng Creamline 1 ang championship double nang gapiin sina James Pecaña at AJ Pareja ng Tuguegarao, 21-17, 21-16, sa men’s finale.  

 Ito na ang ika-5 BVR crown ni Rondina, habang nasikwat ni Pons ang kanyang ikatlo.   

Ang torneo ay nagsilbi ring paghahanda ng national team standouts, sa pangunguna nina Rondina at Pons para sa Asian Senior Beach Volleyball Championship sa Phuket, Thailand sa susunod na buwan.  

“Sobrang grateful sa pagkakaroon ng opportunity na makapaglaro dito. Tuloy kami sa goal namin,” wika ni Pons, na pinasalamatan din ang Philippine National Volleyball Federation at BVR para magkaroon ito ng katuparan.  

  Sa semis ay nalusutan nina Rondina at Pons ang A-game nina Ella at Iza Viray sa first set bago naitarak ang 21-17, 21-12 panalo para umabante sa title match.  

Pinataob naman nina Rodriguez at Gervacio sina Sta. Lucia 1’s Jackie Estoquia at DM Demontaño, 21-13, 17-21, 18-16, sa 52-minute semifinal upang maisaayos ang championship duel kina Rondina at Pons.  

Samantala, ito na ang ika-7 BVR title ni Arbasto at ika-2 sunod ni Garcia habang naghahanda para sa international competitions.  

“Siguro focus lang kami sa goal. Hindi lang kami nagpe-prepare dito (BVR) kundi sa Asian Senior Beach Volleyball Championship sa Thailand (next month) and sa SEA Games next year,” ani Garcia.