BATANGAS- ISANG Canadian national ang natagpuan wala ng buhay sa bahay nito sa Barangay Lucsuhin, Calatagan sa lalawigang ito nitong Martes ng umaga.
Patay din ang dalawang alaga nitong aso na nakita naman sa labas ng garahe ng bahay.
Kinilala ng pulisya ang biktima na si Steve Vincent Florito, 59-anyos, residente ng nasabing lugar
Ayon kay Major Emil Mendoza, hepe ng Calatagan police station, pinuntahan ng mga pulis at opisyal ng barangay ang bahay ni Florito dahil sa sumbong ng mga kapitbahay nito na may mabahong amoy na nagmumula sa bahay ng biktima.
Nang buksan ng mga awtoridad ang pinaka- main door ng bahay, dito na umano bumungad ang bangkay ng Canadian na pinagmumulan ng masangsang na amoy.
Malapit na rin maagnas ang dalawang aso ng biktima na nakita sa compound ng bahay at may palatandaan na namatay sa uhaw at gutom.
Ayon kay Mendoza, wala umanong naganap na foul play sa pagkamatay ng dayuhan dahil walang force entry o magulong bahagi ang tinitirhan ni Florito at wala rin umanong saksak, galos o sugat sa anuman parte ng katawan nito. ARMAN CAMBE