QUEZON- DEAD on arrival sa pagamutan ang isang driver at anak nito matapos mahulog sa bangin ang sinasakyan nilang cargo truck sa Real ng nasabing lalawigan.
Base sa ulat ng Real police, kinilala ang mga nasawi bilang sina Alfonso Castro, 41-anyos, at anak na si Allen, 21-anyos, kapwa residente ng Baliwag, Bulacan.
Lumitaw sa pagsisiyasat na tinatahak ng mag-ama ang pababang bahagi ng national highway patungo sa direksyon ng Infanta nang mangyari ang aksidente bandang alas-7:45 ng kamakalawa ng umaga.
Nagdire-diretso umano ang truck sa pakurbadang daan na walang mga harang hanggang sa bumangga sa mga puno at nahulog sa banging may lalim na 40 talampakan.
Nagkawasak-wasak ang truck na may kargang animal feeds at naipit sa loob ang mga biktima.
Tumagal nang 3 oras bago nahugot ng rescue team ang mga biktima at nagawa pang maitakbo sa rural health unit pero idineklara patay na nang dumating. VERLIN RUIZ