MALABON CITY –SUGATAN ang isang dalaga na cashier ng isang gasolinahan matapos tamaan ng ligaw na bala mula sa service firearm ng lasing na duty security guard kamakalawa ng gabi.
Inoobserbahan na sa Valenzuela City Medical Center sanhi ng tinamong tama ng bala sa katawan si Kharen Barcenilla, 31, ng 286 Mithi St., Brgy. 24, Caloocan City.
Nakapiit naman habang nahaharap sa kaukulang kaso ang suspek na nakilalang si Manuel Mondejar Jr., 39, security guard, at residente ng 460, Catmon.
Sa imbestigasyon nina PSSg Ernie Baroy at PSSg Philip Cesar Apostol, dakong alas-9:30 ng gabi, lasing na naka-duty sa binabantayang Petron Gasoline Station sa kahabaan ng M.H Del Pilar St., Brgy. Maysilo nang aksidenteng pumutok ang kanyang service firearm shotgun at tinamaan ng ligaw na bala ang biktima.
Mabilis na isinugod ang biktima sa naturang pagamutan habang nadakip naman ang suspek ng mga rumespondeng mga tauhan ng PCP-1 na sina PCpl Dexter Tolentino at Pat. Victor Mandac.
Narekober ng mga pulis ang isang shotgun at isang basyo ng bala ng 12 gauge. VICK TANES
