(Cayetano umaasa) ‘SNOWBALL OF SUPPORT’ SA P10K AYUDA

UMAASA si dating Speaker Alan Peter Cayetano na magkakaroon ng ‘snowball of support’ para sa kanyang isinusulong at ng mga kasamang kongresista sa Back To Service na P10K Ayuda Bill sa Kamara.

Ito ay matapos na magpahayag ng suporta sa naturang panukala si Parañaque 2nd District Rep. Eric Olivares. Sa panayam ng DZRJ, sinabi ni Olivares na ‘full support’ siya sa P10K Ayuda  Bill ni Cayetano dahil kailangan ito ng sambayanang Filipino.

“Kung kaya ng budget bakit hindi para sa mga nangangailanan, kung kaya ng appropriation na i-budget po ‘yon para sa nangangailangan full support tayo doon kung kaya ng budget’’, ani Olivares.

Lubos naman ang pagpapasalamat ni Cayetano kay Olivares at sa iba pang mga kongresista na, aniya, ay payag at sumusuporta rin sa P10K Ayuda Bill.

“May consensus naman talaga ang buong Filipinas na kailangan ng P10K ayuda ang mga Filipino at ito’y mabuti sa ekonomiya at ito ay mabuti sa pamilya,”  giit ni Cayetano.

Nakiusap din si Cayetano sa mga kapwa kongresista na bilisan ang aksiyon at suporta sa P10K Ayuda Bill upang maibigay agad ito sa mga nangangailangan lalo na ang mga pamilyang nawalan ng kabuhayan at inilugmok ng pandemyang COVID-19.

Mahalaga,  aniya, na maikasa na ang P10K ayuda upang agad na maaksiyunan ang pagbibigay ng iba pang stimulus package para sa ibang sector ng lipunan.

‘’Kaya pakiusap ko sa lahat ng kongresista na gawin nating mabilis at i-explain natin sa Malakanyang na may pera naman at agad-agad na ‘yung P10K ay maibigay at agada-agad na isunod naman ang iba pang stimulus  gaya ng health, agriculture, tourism, education, at kabuhayan.’’

Ang P10K Ayuda Bill ay inihain ni Cayetano at ng kanyang mga kaalyado noong February 2021. Sa halip na ito ay talakayin ay isinama ito sa pagtalakay sa Bayanihan 3 ngunit ‘di rin nabigyab ng halaga dahil mas isinulong pa ng Kamara ang pagbibigay ng P1K sa bawat Filipino.

Ito ay mariin namang tinutulan ni Cayetano dahil hindi, aniya,  limos ang kailangan ng mga tao sa kasalukuyan.

’’Extraordinary times need extraordinary measures. Hindi po limos ang kailangan ng mga Pilipino sa ngayon’’, ayon pa sa dating speaker.

Nauna rito ay nanawagan si Cayetano sa mga tao na pakiusapan at ligawan ang kanilang mga kongresista na sumuporta sa P10K Ayuda Bill.

Aniya, alam nya ang damdamin ng mga kasama sa Kongreso tungkol sa naturang panukala. ‘’Alam ko naman ang damdamin ng mga kongresista at payag rin sila.”

Noong Mayo 1,  Araw ng Paggawa, ay inilunsad ni Cayetano at ng kanyang grupo ang Sampung Libong Pag-asa kung saan mahigit 200 benepisyaryo ang nakatanggap ng P10K ayuda mula sa kanilang sariling pagsisikap. Ito ay upang mahikayat ang Kamara na aksiyunan na ang panukala upang makatulong sa maraming pamilyang Filipino na makapag-umpisa ng maliit na kabuhayan at makabangon paunti-unti mula sa pagkakalugmok dulot ng COVID-19.

Related posts:

(Isinusulong para sa mas mabilis na ayuda) ‘ONE FILIPINO, ONE BANK ACCOUNT’ (Hanggang sa Mayo 15) ‘ECQ AYUDA’ DISTRIBUTION PINALAWIG (Pinabubusisi sa COA) REKLAMO SA PAMAMAHAGI NG AYUDA (Sa ilalim ng Bayanihan 3) P2K AYUDA SA BAWAT FILIPINO P1K LANG NA AYUDA SA BAYANIHAN 3 INALMAHAN NI CAYETANO (Sa panibagong lockdown) AYUDA SA MSMES TULOY (Apela sa DBM, DOF, DOLE) WORKERS AYUDAHAN SA 2-WEEK ECQ P10K AYUDA NAKA-10K BENEPISYARYO NA