CHAMPION’S LEAGUE LALARGA SA NOBYEMBRE

ITINAKDA ng Philippine National Volleyball Federation (PNVF) sa isang virtual meeting noong Martes ng gabi ang men and women Champion’s League (CL) sa Nobyembre.

Ayon kay PNVF President Ramon ‘Tats’ Suzara, alinsunod sa rekomendasyon ng CL Working Group, ang Women’s CL ay gaganapin sa November 13-19 habang ang Men’s CL ay sa November 2026.

Walong koponan ang lalaro sa hanggang 24 matches sa bawat kategorya.

Target ng PNVF ang Ilocos Norte Centennial Arena sa Laoag City, Claro M. Recto Events Center sa Lipa City o ang Tagaytay City bilang potential venue para sa semi-bubble competitions.

Nakasama ni Suzara sa miting sina PNVF Secretary General Don Caringal, Vice President Dr. Arnel Hajan at Board Members Charo Soriano, Carmela Gamboa at Yul Benosa at Technical and Coaching Commission Chair coach Jerry Yee.

Dumalo rin ang mga kinatawan mula sa Metro Manila clubs Cignal HD, Black Mamba-Army, Sta. Lucia, Chery Tiggo, PetroGazz and F2 Logistics, gayundin ang mga koponan mula sa Baguio City at Iligan City sa one-and-a-half hour virtual meeting.

Ayon kay Suzara, ang CL ay isang national league na pag-aari ng PNVF na naglalayong pagsama-samahin ang lahat ng volleyball stakeholders sa pamamagitan ng ‘high level of play’ sa club level.

“It is also one of the PNVF’s 10-point agendas which is to serve Filipino families with entertainment through volleyball and to make volleyball a widely played sport by elevating it through high-performance competition,” ani Suzara.

Sa preliminary round ay hahatiin ang walong koponan sa dalawang pools na maglalaro sa round-robin format. Sa pagtatapos ng pool play, ang mga koponan ay ira-rank at uusad sa quarterfinals na lalaro sa cross-over single elimination tulad ng mga sumusunod: 1A vs 4B, 1B vs 4A, 2A vs 3B, 2B vs 3A.

Ang quarterfinals winners ay aabante sa semifinals, habang ang losing clubs ay sasalang sa classification round.

Ang semifinals winners ay uusad sa gold medal match, habang ang losing teams ay lalaro para sa bronze medal.

Ang deadline ng pagsusumite ng 20-player rosters ay sa October 20.

195 thoughts on “CHAMPION’S LEAGUE LALARGA SA NOBYEMBRE”