CONG. RUTH HERNANDEZ SASABAK SA LAGUNA GUBERNATORIAL RACE

ISANG mahalagang hakbang tungo sa demokrasya ang pagsasagawa ng independent at non-commissioned survey ng Pulso Ng Bayan-One Research Philippines Inc. mula Agosto 1-31, 2024.

Ang resulta ng survey na ito, na mayroong 5,000 rehistradong botante mula sa iba’t ibang bayan at lungsod ng Laguna, ay nagbigay ng malinaw na indikas­yon sa kung sino ang nais ng mga Lagunense na maging susunod na gobernador.

Nanguna si Rep. Ruth Hernandez na may 29%, sumunod si Rep. Dan Fernandez na may 28%, at si Sol Aragones na may 25%.

Bagama’t dikit ang laban, ipinapakita ng mga numerong ito na ang bawat isa sa kanila ay may malalim na koneksyon sa mga mamamayan ng Laguna. Ang resulta ng survey ay nagpapakita ng demokratikong pagpapahalaga ng mga Lagunense, kung saan ang bawat kandidato ay tila pantay-pantay na kinikilala at sinusuportahan.

Habang patuloy na umiikot ang mga kandidato upang makuha ang tiwala ng bawat botante, ang pagpili ng mga Lagunense ay batay sa kanilang track record, proyekto, at kakayahan na tugunan ang mga pangangailangan ng lalawigan. Isa sa mga pangunahing tanong ay kung sino ang may mas malinaw na plano para sa pagpapabuti ng pamumuhay ng mga residente at kung sino ang may mas matibay na ugnayan sa mga lokal na komunidad.

Samantala, ang kasalukuyang administrasyon sa ilalim ni Gov. Ramil Hernandez ay patuloy sa pagtataguyod ng mga proyektong pang-edukasyon, katulad ng pagtatayo ng two-storey, 12-classroom academic building sa Laguna State Polytechnic University-Los Baños Campus. Ang proyekto, sa pakikipagtulungan ng DPWH, ay inaasahang matatapos sa 2025. Malaki ang maitutulong nito upang tugunan ang tumataas na bilang ng mga estudyante sa unibersidad, na siyang magbibigay ng mas maayos na pasilidad para sa kanilang pag-aaral.

Ang proyektong ito ay hindi lamang isang gusali, ito ay isang simbolo ng pangako ng pamahalaang lokal at ng pamunuan ng LSPU na patuloy na magbibigay ng oportunidad sa kabataan ng Laguna. Ang edukasyon ay ang susi sa isang mas magandang kinabukasan, at sa pamamagitan ng mga ganitong inisyatibo, lumalapit ang mga mag-aaral sa kanilang mga pangarap.

Sa kasalukuyang panahon, mahalaga ang pagkakaisa at pagtutulungan, tulad ng ipinakita ng Serbisyong Tama Kababaihan (STK) Biñan sa kanilang Ge­neral Assembly na dinaluhan ng 4,700 mi­yembro. Ang energy at pagmamahal na ipinakita ng mga kababaihan ay nagpapatunay na sila ay isang aktibong puwersa ng pagbabago.

Sa ilalim ng pamumuno nina Gov. Ramil at Cong. Ruth Hernandez, patuloy na lumalago ang STK, nagbibigay ng proteksyon at oportunidad sa mga kababaihan upang itaas ang antas ng kanilang pamumuhay.

Aba’y sa huli, ang pagkakaisa, serbisyo, at dedikasyon ng mga lider ng Laguna ay nagsisilbing inspirasyon sa lahat ng mamamayan. Ang kanilang mga proyekto at adhikain ay hindi lamang para sa kasalukuyan kundi para sa mas maliwanag na kinabukasan ng bawat Lagunense.