COTABATO-KAPWA idineklarang dead on arrival sa pagamutan ang mayor ng Libungan town ng lalawigan ng Cotabato at driver nito nang pagbabarilin sa isang ginagawang sabungan nitong Lunes ng umaga.
Pinagbabaril ng apat na hindi pa nakikilalang kalalakihan sina Mayor Christopher Cuan, 46-anyos at driver bodyguard nitong si Edwin Ihao, 36-anyos.
Sa inisyal na pagsisiyasat, nabatid na binuntutan ng mga suspek ang kulay asul na SUV ng mga biktima at gamit ang long firearms ay pinaulanan ng bala ang alkalde at driver nito bandang alas- 10:25 ng umaga.
Nabatid na kararating lamang ng mga biktima mula Davao City at agad na nagtungo sa ginagawang Cabaruyan cockpit arena.
Naisugod pa sa pagamutan si Mayor Cuan at ang kanyang driver ngunit kapwa sila binawian ng buhay.
Sinasabing nagtamo ng maraming tama ng bala sa iba’t ibang parte ng kanyang katawan si Mayor Cuan at driver nito.
Base sa imbestigasyon, una nang binaril si Cuan sa harap ng municipal hall noong nakalipas na taon ngunit hindi ito tinamaan.
Inamin mismo noon ni Mayor Cuan na marami na siyang banta sa buhay pero hindi siya takot dahil wala naman daw siyang atraso o kaaway. VERLIN RUIZ
Comments are closed.