COVID-19 CASES SA PINAS MAHIGIT 1M NA

INIULAT ng Department of Health (DOH) na umabot na sa mahigit isang milyong indibidwal ang tinamaan ng coronavirus disease 2019 (COVID-19) sa Pilipinas.

Ito ay batay sa COVID-19 case bulletin no. 408, na inilabas ng Department of Health (DOH), hanggang 4:00 ng hapon nitong Lunes.

Ayon sa DOH, nakapagtala pa sila ng karagdagang 8,929 bagong kaso ng sakit araw ng Lunes kaya’t umakyat na sa 1,006,428 ang kabuuang bilang ng dinapuan ng virus sa bansa.
Gayunman, sinabi ni Health Secretary Francisco Duque III na hindi dapat na tingnan ang bilang ng dinapuan ng virus, kundi ang bilang ng mga gumaling na sa karamdaman.

Anang DOH, nakapagtala naman sila ng 11,333 bagong nakarekober sa sakit kaya umabot na sa 914,952 ang kabuuang bilang ng mga gumaling sa COVID-19.

Samantala, nasa 74,623 ang nananatili pang aktibong kaso o nagpapagaling pa sa karamdaman.

Sa mga aktibong kaso, 95.4% ang mild, 1.4% ang asymptomatic, 1% ang kritikal, 1.3% ang severe at 0.87% ang moderate cases.
Nadagdagan naman ng 70 ang bilang ng mga pumanaw sa karamdaman kaya’t umakyat na ito ngayon sa kabuuang 16,853.

Nabatid na may 23 duplikado ang inalis sa kabuuang bilang, kasama ang 18 na nakarekober.

Bilang karagdagan, mayroon namang isa ang nagnegatibo sa virus at tinanggal na rin sa kabuuang bilang.

May 27 kaso rin ang unang sinabi na nakarekober ngunit malaunan ay natuklasang binawian pala ng buhay, matapos ang pinal na balidasyon.

Iniulat pa ng DOH na may dalawang laboratory ang hindi operational noong Abril 24 habang siyam na laboratory ang hindi nakapagsumite ng datos sa COVID-19 Document Repository System (CDRS).

Para sa karagdagang detalye, bisitahin ang pampublikong site na www.doh.gov.ph/covid19tracker. Ana Rosario Hernandez