COVID SHIELD CONTROL PASS MULING IPATUTUPAD

CAGAYAN-DAHIL sa patuloy ang pagtaas ng kaso ng COVID-19 sa lungsod ng Tuguegarao, muling ipinatupad kahapon ang pagamit ng ‘’Co­vid Shield Control Pass’’ sa nasabing siyudad.

Ayon kay Tuguegarao City Mayor Jefferson Soriano, inatasan nito ang mga Barangay official na ibalik muli ang mga checkpoint sa kani-kanilang mga barangay at pamamahagi ng control pass sa mga residenteng kinakailangang lumabas upang magtungo sa sentro ng lungsod para mamili ng kanilang mga pangangailangan.

Subalit, nilinaw ng alkalde na may limitasyon sa oras ng pagkuha at pagbalik sa barangay upang mali­mitahan ang dami ng tao sa labas.

At sa mga hindi residente ng lungsod ngunit nagtratrabaho sa Tuguegarao City ay kailangan lamang ipakita sa checkpoint ang kanilang company ID o certificate of employment kahit na nagtratrabaho sa gobyerno, academe at frontliners.

Gayundin, papayagan pumasok ang mga residente mula sa ibang bayan na may mahalagang lakad sa lungsod basta’t makapagpakita ng anumang valid Identification (ID) card.

Ayon sa alkalde, sa kasalukuyan ay nasa 40% ang positivity rate sa lungsod kung saan mahigit 90 ang nakatakdang i-swab ngayong araw.

Sinabi pa nito, pasisimulan din ngayon ang 30% workforce sa Pamahalaang Panlungsod habang sinisiguro na patuloy ang serbisyo ng frontline services na siyang tutulong sa pagsasaayos sa buong lungsod ng Tuguegarao upang makontrol ang patuloy na pag­lobo ng COVID-19. IRENE GONZALES