CPP-NPA DUDURUGIN NG BAGONG AFP CHIEF

CAMP AGUINALDO- UMUPO na bilang bagong Armed Forces of the Philippines (AFP)  chief of Staff si Lt. Gen Felimon Santos, na sinasabing kalabang mortal ng Communist Party of the Philippine-New People’s Army (CPP-NPA).

Sa isang turn-over ceremony kahapon sa Tejeros Hall sa AFP Officers Club sa Camp Aguinaldo ay iniluklok ni Pangulong Rodrigo Duterte ang bagong AFP Chief of Staff kapalit ng nagretirong si Gen. Noel Clement.

Magugunitang sa pamumuno ni Santos bilang Philippine Army Intelligence and Security group chief ay naging matagumpay ang serye ng intelligence project ng Army na nagresulta sa sunod na pagkakaaresto ng matataas na lider ng CPP-NPA.

Kabilang dito ang mag- asawang Wilma at Benito Tiamzon na namumuno sa New People’s Army at kapwa ranking CPP-NPA-NDF central committee members.

Pinasalamatan ng heneral ang Pangulo sa tiwala para pangunahan ang AFP.

Isa sa marching order ng pa­ngulo ang pagwasak sa CPP-NPA na wakasan ang rebelyon at tero­rismo.

Ayon kay Santos, pangungunahan niya ang hukbong sandatahan sa pagtapos sa communist insurgency, pagneyutralisa sa terror groups na naimpluwensiyahan ng  Islamic State (ISIS) terror network, at susuportahan din ang  police at anti-drug agencies sa kanilang kampanya kontra ilegal na droga.

Inihayag ni Army Spokesman Col Ramon Demy Zagala na tinagurian si Santos bilang “expert intelligence officer” na nagsilbing AFP Deputy Chief of Staff for Intelligence, J2, mula Nob­yembre 2016 hanggang  Oktubre 2017.

Miyembro ng  Philippine Military Aca­demy “Sinagtala” class of 1986, ang heneral ay isang Scout Ranger at  Field Artillery officer.

Bago ito naitalagang pinuno sa 7th Infantry Division sa  Central Luzon na nakabase sa Fort Ramon Magsaysay sa Nueva Ecija. VERLIN RUIZ