DA-MIMAROPA NAGKALOOB NG MAKINARYA SA MGA MAGSASAKA

MAS magiging madali na ang pagbubungkal, paglilinis ng sakahan at paghahanda ng lupa ng mga magsasaka ng Salvacion Farmers Association dahil sa mga makinaryang ipinagkaloob ng Kagawaran ng Pagsasaka – Rehiyon ng MiMaRoPa.

Sa ilalim ng High-Value Crops Development Program at sa pakikipagtulugan ng Puerto Princesa City, ipinagkaloob sa nasabing samahan ang isang unit ng Cultivator at isang unit ng grass cutter na may kabuuang halagang P274,000.00.

Ang mga ipinagkaloob na makinarya ay naglalayong matulungan na pagaanin ang kanilang trabaho sa kani-kanilang sakahan at bawasan ang kanilang gastos sa paghahanda ng kanilang sakahan.

Nagpahayag ng pasasalamat si G. Alberto Jagmis, Jr., ang presidente ng asosasyon.

“Dahil sa naibigay na kagamitan pangsakahan ay mas magiging madali po ang aming paggugulayan. Mas paiigtingin pa po namin ang aming samahan upang makapag-produce pa po kami ng gulay at makatulong din sa aming pamilya,” wika ni Jagmis.

Personal na sinaksihan ang aktibidad ni Vice Mayor Maria Nancy Socrates, Puerto Princesa City Councilors Elgin Damasco, Patrick Alex Hagedorn, Henry Gadiano, Herbert Dilig at Deputy Mayor North West Cluster Modesto Rodriguez.

Kasama naman bilang kinatawan ng Kagawaran ng Pagsasaka si Agricultural Program Coordinating Officer Vicente Binasahan, Jr.

Ipinahayag ng city government ng Puerto Princesa, sa pangunguna ni Mayor Lucilo Bayron, na lubos ang kanilang suporta pagdating sa agrikultura dahil isa ito sa mahalagang pinagkukunan ng pagkain ng taumbayan, lalo na sa panahong ito.

“Makaaasa kayo na ang suporta ng city government ay pangangalagaan at bibigyan ng pansin ang ating mga magsasaka dahil kayo (magsasaka) ang nagpapakain sa bawat lamesa ng pamilya,” mensahe ni Mayor Bayron.

Nagtapos ang aktibidad sa pagbenta ng kanilang mga naaning gulay.
(DA-RFO IVB, RAFIS)