SUPORTADO ni Vice Presidential Candidate Davao City Mayor Sara Duterte ang kandidatura ni Cong. Amado ‘Daddy A’ Bagatsing bilang alkalde ng Maynila ngayong halalan 2022.
Lubos ang pasasalamat ni Bagatsing sa ipinakitang suporta ni Mayor Sara na personal pang dumalo sa ginanap na proclamation rally ng Team KABAKA sa San Andres Bukid, Maynila.
“We thank our incoming Vice President Mayor Sara Duterte for the support. Matagal na ring malapit na kaibigan ng aming pamilya si Mayor Sara. Ang presensiya lamang niya ay nagpapakita ng kanyang pakikiisa sa laban ng buong Pamilya KABAKA para sa ikagiginhawa ng mga Manilenyo,” wika ni Bagatsing.
Naniniwala rin si Cong. Amado na ang suportang ipinakita ni Mayor Sara maging sa kanyang anak na si Manila 5th District Congresswoman Candidate Cristal Bagatsing, ay isang senyales na malaki ang tiwala nito na nasa mabuting kamay at pamamahala ang lungsod ng Maynila kung sakaling palarin silang magwagi sa halalan.
Magugunitang kamakailan naman ay mismong si Pangulong Rodrigo Duterte ang nag-endorso sa kandidatura ni Bagatsing bilang mayor ng Maynila.
Maliban kay Mayor Sara ay dumalo rin sa ginanap na proclamation rally ng tinaguriang ‘Ama ng Batang Maynila’ at Pamilya KABAKA sa Maynila ang ilan sa mga kandidatong senador ng UniTeam.