NAGPADALA ang Philippine National Police (PNP) ng nasa 250 mga tauhan nito na nakatalaga sa Camp Crame sa Quezon City para palakasin ang puwersa ng mga pulis sa mga lansangan sa Metro Manila bilang paghahanda sa paglobo ng mga kriminal na aktibidad sa pagsisimula ng ber months.
Batay sa datos ng PNP, karaniwang tumataas ang mga criminal activities lalo na ang pagnanakaw, street crimes sa yuletide season .
Ayon kay Brig. Gen. Jonnel Estomo, direktor ng National Capital Region Police Office (NCRPO), ang mga pulis na kasing laki ng batalyon ay idi-deploy karamihan sa Katimugang bahagi ng Metro Manila na sakop ng Makati, Pasay, Parañaque, Taguig at Las Piñas.
Aniya, ang karagdagang manpower na ipinadala sa NCRPO ay gagamitin para dagdagan ang deployment ng SPD na binubuo ng 368 tauhan na nagsasagawa ng tatlong-shift, walong oras na tour of duty sa ilalim ng S.A.F.E. NCRPO program na naglalayong tiyakin na ang mga pulis ay nakikita, pinahahalagahan sa pamamagitan ng paghahatid ng pambihirang serbisyo publiko.
Sinasabing ang ayudang puwersa ay malaking tulong sa pagsisikap na matiyak ang kapayapaan at kaayusan sa Metro Manila lalo na sa panahon ng Kapaskuhan. VERLIN RUIZ