(Dahil sa health reasons) DBM CHIEF NAG-RESIGN

NAGBITIW na sa puwesto si Budget Secretary Wendel Avisado dahil sa kasalukuyang kondisyon ng kanyang kalusugan.

Ayon kay Presidential Spokesperson Harry Roque, tinanggap na ni Presidente Rodrigo Duterte ang pagbibitiw ni Avisado.

“PRRD (President Rodrigo Roa Duterte) has accepted Sec. Wendel Avisado’s resignation due to medical reasons,” ani Roque.

Si Budget Undersecretary Tina Rose Marie Canda ang itinalagang officer-in-charge (OIC) ng Department of Budget and Management (DBM) magmula nang mag-medical leave si Avisado noong Aug. 2.

Si Avisado ay nag-medical leave makaraang tamaan ng COVID-19 at para sumailalim sa mga serye ng examinations, 14 taon makaraang operahan sa puso.

Naospital siya ng walong araw at nag-quarantine ng mahigit isang buwan makaraang tamaan ng COVID-19.

Samantala, tiniyak ni Speaker Lord Allan Velasco na walang magiging epekto sa nakatakdang pagbusisi ng Kamara sa panukalang P5 trilyon na national budget para sa susunod na taon ang pagbibitiw sa puwesto ni Avisado.

Sinabi ng lider ng Kamara na bagama’t ikinalulungkot nila ang pagre-resign ng kalihim, nauunawaan naman nila na ang pangangalaga sa kalusugan ang dapat na mas maging prayoridad lalo na ngayong panahon ng pandemya.

“We wish him well and we hope that this will allow him more time to take care of himself and be with his family,” ayon pa kay Velasco,

“We wish to assure the public that this development will not affect the upcoming budget deliberations in Congress. We trust that the Department of Budget and Management led by its officer-in-charge, Undersecretary Tina Rose Marie Canda, will carry on the task and continue its work on the 2022 National Expenditure Program (NEP),” dagdag pa niya.

Sinabi ni Velasco na inaabangan na ng Lower House ang pagsusumite ng Palasyo ng 2022 National Expenditure Program upang agad nila itong matalakay at maaprubahan sa takdang panahon gaya ng ginawa nila noong nakaraang taon. ROMER R. BUTUYAN