(Dahil sa surge ng COVID-19 cases) MECQ MULING IPATUTUPAD SA TUGUEGARAO CITY

CAGAYAN-MULING ipatutupad ni Mayor Jefferson Soriano ang modified enhanced community quarantine (MECQ) sa lungsod ng Tuguegarao dahil sa patuloy na pagtaas ng kaso ng COVID-19 nitong mga nakalipas na araw.

Nabatid na nasa 66 ang bagong kaso ng COVID-19 sa naturang siyudad at sa kasalukuyan ay patuloy pa umano na tumataas umaabot na sa bilang na 75.

Aniya,nakababahala na ang patuloy na pagtaas ng COVID-19 cases sa lungsod kaya kailangang gumawa ng kaukulang hakbang upang ito ay mapigilan.

Sinabi pa ni Soriano na oobserbahan ngayong araw kung patuloy pa rin ang pagtaas ng kaso ng COVID-19 ay hihilingin na nito kay Governor Manuel Mamba na magpatupad ng MECQ sa buong lungsod.

Samantala, isa sa umano’y nakikita ng alkalde na dahilan ng pagtaas ng kaso ng virus sa kanilang lungsod ay dahil sa hindi pagsunod sa minimum health protocols.

Partikular na tinukoy nito,ang isang bahay na may nakatirang na nagpositibo sa virus at isang lalaki na nakisakay para pumunta sa ospital na hindi nito inamin na positive siya sa COVID-19.

Kaugnay nito, nananawagan ang alkalde sa kanyang nasasakupan na sumunod lamang sa kautusan kaugnay sa pinaiiral na health protocols na bagaman wala pang Delta variant sa lungsod ay dapat na dagdagan pa ng mga pag-iingat upang hindi makapasok ang nakamamatay na virus. IRENE GONZALES