NAVOTAS CITY – DEAD on the spot ang isang lalaki matapos pagbabarilin ng hindi pa nakikilalang suspek sa lungsod.
Agad na binawian ng buhay sanhi ng tinamong mga tama ng bala sa katawan ang biktimang si Benedict Leongson Jr., alyas “Unyo”, 22, ng 387 Gov. Pascual St., Brgy. San Jose habang mabilis namang tumakas sa hindi matukoy na direksiyon ang suspek matapos ang insidente.
Sa nakarating na ulat kay Navotas Police Chief P/Col. Rolando Balasabas, alas-5:30 ng hapon, naglalakad ang biktima sa kahabaan ng Daang-banko St., San Roque nang lapitan ito ng hindi kilalang suspek at walang sabi-sabing pinagbabaril sa katawan.
Sa pahayag sa pulisya ng kapatid ng biktima, dati ng nasangkot sa ilegal na droga ang kanyang kapatid.
Patuloy naman ang follow-up na imbestigasyon ng mga pulis para sa posibleng pagkakakilanlan at pagkakaaresto sa suspek habang inaalam pa ang tunay na motibo sa insidente. EVELYN GARCIA
