Walang pagsidlan ng saya ang mag-asawang Iza Calzado at Ben Wintle ngayong meron na silang baby girl na tinawag nilang Deia Amihan Calzado Wintle.
Sobrang pasasalamat raw nila sa Diyos na malusog at maganda ang kanilang anak nang isilang noong nagdaang Janury 26, dahil alam naman nating nagkakaedad na rin si Iza at medyo delikado nang manganak.
Pero heto, may baby na nga siya, at kahit hindi pa natin nakikita ang mukha, pihadong maganda – dahil kanino pa ba naman magmamana?
Matagal ding naghintay ang mag-asawa sa kanilang anak. Taong 2018 pa sila nagpakasal pero kelan lamang nagbuntis si Iza. Laking pasasalamat raw nga niya sa kanyang asawa dahil talagang inalagaan siya nitong mabuti pati na ang kanilang anak.
Aminado si Iza na hindi perpekto ang kanilang pagsasama, pero very strong daw ang character ng kanyang asawa at maaasahan talaga ito sa panahon ng pangangailangan. Sa ngayon, masasabi raw ni Iza na napakaswerte niya dahil bukod sa maayos ang kanyang acting career at ang kanyang marriage life. Bonus pa na niregaluhan sila ng Diyos ng isang Deia Amihan na lalo pang nagpatibay sa kanilang pamilya. KNM