RIZAL-ARESTADO ang isang delivery rider at kasamahan nito sa isinagawang drug buy bust operation ng mga operatiba ng Binangonan Municipal Drug Enforcement Team (MDET) sa Binangonan sa lalawigang ito.
Dakong alas-11:10 kamakalawa ng gabi nang masakote ang mga suspek sa kahabaan ng Manila East Road, Brgy, Darangan.
Ayon sa ulat ni Rizal Police Provincial Director, Col Dominic Baccay kay Calabarzon Regional Director BGen Jose Melencio Nartatez Jr., nadakip sa isinagawang buy-bust operation ang mga suspek na kinilalang sina Mark Dinan y, Taeza , 33-anyos, delivery rider at kasamang si Jumiko Nuezca y Kumi, 31-anyos, laborer, kapwa residente ng San Pedro, Laguna.
Narekober mula sa dalawa ang 27.5 gramo ng shabu na may street value na P187,000.00, isang P1,000 bill, dalawang motorsiklo na gamit ng mga suspek .
Samantala, dinala ang mga nakuhang ebidensiya sa Rizal Provincial Forensic Unit para sa tamang disposisyon habang nasa kustodiya ng Binangonan Custodial Facility ang mga suspek na nahaharap sa paglabag sa Comprehensive Dangerous Drugs Act of 2002 o RA 9165.
Ayon Kay Baccay, ang sunod sunod na matagumpay na drug buy bust operasyon ng Rizal PNP ay isang babala sa mga pusher at user na wala puwang ang mga ito sa lalawigan dahil hindi titigil ang mga awtoridad sa kampanya laban sa droga. ELMA MORALES
