ARESTADO ang isang rider ng Food Panda delivery nang mahulihan ng shabu na dapat sana niyang idedeliber kahapon ng madaling araw sa Sta.Cruz, Maynila.
Kinilala ang suspek na si Eduardo De Los Santos na isa rin embalsamador,48-anyos.
Ayon kay Lt.Col John Guiagui, aabot sa dalawang gramo na may street value na P13K ang shabu na idedeliber sana ng suspek sa isa nitong kliyente na naghihintay sa may Oroqueta St. sa kanto ng Yuseco St. nang masita ng mga nagpapatrulyang pulis, pasado alas-12 ng madaling araw.
Ayon kay Guiagui, dati nang sumuko ang suspek noong magsimula ang kampanya laban sa iligal na droga matapos ang Operation Tokhang pero bumalik na naman sa paggamit at pagbebenta ng iligal na droga.
Sasampahan ng kasong paglabag sa RA 9165 o kilala bilang Comprehensive Dangerous Drug Act of 2002 sa Manila Prosecutors Office ang suspek. PAUL ROLDAN