NAGPATAWAG ngayong Martes, Hulyo 9, ng diyalogo si Land Transportation Franchising and Regulatory Board (LTFRB) Chairman Martin Delgra kasama ang transport network vehicle services (TNVS) community na inaasahang dadaluhan ng Anti-Red Tape Authority (ARTA) upang tuluyang maayos ang gusot sa aplikasyon ng Grab drivers ng hatchback at sedan sa Metro Manila.
Ayon kay Delgra, bukas ang LTFRB para pakinggan ang mga hinaing ng mga nagrereklamong driver ng TNVS community para magkaunawaan ang bawat panig.
Samantala, pansamantalang itinigil ni Atty. Ariel Inton, pangulo ng Lawyers for Safety Commuters and Protection (LSCP) ang kanila sanang ihahaing kaso laban sa mga opisyales ng LTFRB.
Aniya, kusa silang magsasampa ng kaso sa Office of the Ombudsman bunsod ng may ilang mga ahensiya na rin ng pamahalaan ang tumutulong upang maresolba ang mga problema ng nasabing mga driver.
Subalit sakaling hindi mapagbigyan ng mga opisyal ng LTFRB ang kahilingan ng mga TNVS driver, kanila itong itutuloy upang papanagutin ang LTFRB sa naturang usapin.
Ipinarating naman ng Grab Philippines na nanatiling normal ang operasyon ng Grab sa gitna ng isinagawang transport holiday ng mga TNVS drivers sa iba’t ibang panig ng Kalakhang Maynila.
Ayon kay Fiona Nicolas, communications manager ng Grab, Philippines, hindi gaanong nakaapekto ang idinaos na protesta ng TNVS drivers kahit maging sa rush hour.
Aniya, mas nanaig pa rin sa kanilang mga driver ang kanilang tungkulin na makapagserbisyo sa mga mananakay kahit nagkaroon ng strike. BENEDICT ABAYGAR, JR.
Related posts:
20K BAGONG TNVS SLOTS BINUKSAN NG LTFRB
8K TNVS SIBAK SA GRAB
TNVS CAP TAASAN
10K BAGONG TNVS SLOTS
TRANSPORT HOLIDAY IKINASA NG TNVS COMMUNITY SA LUNES
TNVS APPLICANTS DUMAGSA SA LTFRB
LTFRB PINAGPAPALIWANAG SA ABERYANG IDINULOT SA TNVS
35K TNVS, TAXIS BALIK-PASADA; WALANG TAAS-PASAHE, CASHLESS PAYMENT