DO-OR-DIE (CEU, St. Clare mag-aagawan sa huling finals slot)

Laro ngayon:

(Ynares Sports Arena, Pasig)

Game 3, Best-of-3 Series

3:30 p.m. – CEU vs BRT Sumisip Basilan-St. Clare

MAGSASAGUPA ang Centro Escolar University at BRT Sumisip Basilan-St. Clare sa huling pagkakataon para sa karapatang pumasok sa 2019 PBA D-League Foundation Cup Finals ngayon sa Ynares Sports Arena sa Pasig.

Magpapambuno ang Scorpions at Saints sa deciding Game 3 ng kanilang semifinal series sa alas-3:30 ng hapon kung saan ang magwawagi ay makakaharap ng Marinerong Pilipino sa best-of-three title bout.

Ang do-or-die match ay isang sitwasyong hindi na bago sa magkatunggali dahil ang kanilang semis encounter noong nakaraang conference ay umabot din sa limit, kung saan na­ngibabaw ang CEU tungo sa runner-up finish.

Subalit hindi tulad noong nakaraan, ang Scorpions  ang humirit ng rubber match sa pamamagitan ng 83-68 panalo sa Game 2 noong Lunes.

“After the loss in Game One, I told them I want to see the heart we had last conference and that’s what we showed,” wika ni coach Derrick Pumaren. “We just gotta carry it again on Thursday.”