DOH TUTOL SA PAGGAMIT NG EURO 2 COMPLIANT DIESEL FUEL

KINONTRA  ni Health Secretary Francisco Duque ang go signal ng Department of Ener­gy (DOE) kaugnay sa muling paggamit sa Euro 2 Compliant Diesel Fuel.

Sinabi ni Duque na dapat isinaalang-alang ng DOE ang kalusugan ng mga tao dahil mayroong negatibong epekto ang nasabing uri ng diesel kaya’t tinanggal na ito.

Magugunitang plano ng DOE na muling payagan ang paggamit ng Euro 2 diesel para makatulong sa patuloy na pagtaas ng presyo ng langis.

Nitong Biyernes ay inatasan ng DOT ang oil industry players na mag-alok ng Euro 2-compliant diesel bilang pamalit  para sa transport at industry sector upang mapagaan ang epekto ng inflation.

Ang Euro 2 diesel, na nagtataglay ng mataas na  sulfur, ay mas mura ng  P0.28 anggang  P0.30  sa Euro 4 base sa pagtataya ng Energy Department.

“Kumbaga sa menu ng bibilhin ng isang gagamit ng diesel, pag dumating siya sa isang gasolinahan, dapat may available din na Euro 2 compliant,” pahayag ni DOE Spokesperson Undersecretary Wimpy Fuentebella sa meeting sa  House of Representatives.

Inihayag din umano ng  Department of Environment and Natural Resources (DENR) na negligible naman ang  magiging impact. Mina-match lang talaga  umano ang makina ng mga sasakyang tumatakbo  na  sa mga kalye.

Inatasan din ni Energy Secretary Alfonso Cusi  ang  Philippine Na­tional Oil Company-Exploration Corporation (PNOC-EC) na mag-angkat ng murang petrol­yo.    NENET V.