PATAY ang isang 37-anyos na driver matapos mabangga ang minamaneho nitong Isuzu elf truck ang isang Isuzu cargo sa Navotas City.
Hindi na umabot ng buhay sa Navotas City Hospital sanhi ng tinamong mga pinsala sa katawan ang biktimang si Jayson Leonardo Ong ng No. 460 Miguel St., Brgy., NBBN.
Sa report nina SSg Reysie Peñaranda at Cpl Florencio Nalus kay Navotas police chief Col. Dexter Ollaging, dakong ala-1:45 ng hapon, tinatahak ng Isuzu Elf Ref. Van truck na may plakang (CAC 2096) na minamaneho ng biktima ang kahabaan ng Dalagang Bukid patungong C-3 Road.
Pagsapit sa kanto ng C-3 Road, Brgy. NBBS Dagat-dagatan ay nakabanggaan ng biktima ang Isuzu Cargo Dropside na may plakang (XKA 944) na minamaneho naman ni Nelson Duyag, 38-anyos ng Bldg. 30 Unit 506, Brgy. 128, Smokey Mountain, Tondo Manila.
Matapos ang insidente, mabilis na isinugod ang biktima sa pagamutan subalit, idineklara itong dead on arrival habang nahaharap naman sa kaukulang kaso si Duyag. VICK TANES