DRUG PUSHER ARESTADO, P300K SHABU NAKUMPISKA

ARESTADO ang isang drug pusher na nahulihan ng kulang sa 60 gramo ng shabu sa buy-bust operation ng Pasay police Station Drug Enforcement Unit (SDEU) kahapon ng madaling araw sa Pasay City.

Kinilala ni Pasay police chief P/Col. Cesar G. Paday-os ang inarestong suspekna si Jason Pal ng Barangay 46 Zone 6, Pasay City.

Bago isagawa ang operasyon ng pulisya ay nakakuha ng impormasyon ang SDEU sa kanilang asset tungkol ilegal na operasyon ng suspek na kilalang talamak na tulak ng shabu sa kanilang lugar.

Nang magpositibo ang nakalap na impormasyon ay agad na nagsagawa ng buy-bust operation ang SDEU sa pamumuno ng kanilang team leader na si P/SMS Jonathan R. Bayot na nagdulot sa pagkakaaresto kay Pal.

Narekober sa posesyon ng suspect ang tatlong sachet ng umano’y shabu na nagkakahalaga ng P378,080.

Pinuri naman ni SPD director P/Brig. Gen. Jimili Lopez Macaraeg ang mga operatiba ng SDEU sa pamumuno ni Paday-os sa kanilang patuloy na operasyon na nagreresulta ng pag-aresto ng mga suspek. MARIVIC FERNANDEZ