GENERAL SANTOS CITY- NASAKOTE ng mga awtoridad sa buy bust operation ang isang drug queen na nakumpiskahan ng P1.3 milyong halaga ng shabu sa lalawigang ito.
Kinilala ni BGen. Percival Augustus Placer, Regional Police director ng Soccsksargen Region, ang naarestong suspek na si “Arlene,” 27-anyos ng Barangay Fatima ng nasabing lungsod.
“Agad siyang inaresto matapos niyang ibigay ang mga ilegal na bagay sa police poseur-buyer at tinanggap ang P1,000 buy-bust money,” ani Placer.Nabatid na naganap ang nasabing operation dakong alas-3 ng hapon sa kahabaan ng Banisil Extension, Barangay Dadiangas West.
Kaugnay sa pagkaka-aresto sa suspek ay isinunod ang paghahalungkat sa mga kagamitan nito kung saan ay nakakuha ang mga awtoridad ng dalawang malalaking plastic sachet na naglalaman ng shabu na tumitimbang ng 200 gramo.
Nakatakdang sampahan ng kasong paglabag sa Republic Act 9165, o Comprehensive Dangerous Drugs Act of 2002, laban sa suspek.
EVELYN GARCIA
