NAVOTAS CITY – DEDBOL ang isang hinihinalang notoryus na drug suspect matapos makipagbarilan sa awtoridad sa isinagawang buy bust operation kamakalawa ng gabi.
Kinilala ni Navotas police chief P/Col. Rolando Balasabas ang nasawing suspek na si alyas “Poloy”, isang kilalang drug pusher at kabilang sa drug watch list ng pulisya at barangay.
Sa nakalap na ulat kay Col. Balasabas, naganap ang insidente alas-11 ng gabi sa kahabaan ng Blk 10 Market 3, Navotas Fish Port, Barangay North Bay Boulevard North (NBBN) matapos ang ikinasang buy bust opertation ng mga operatiba ng Station Drug Enforcement Unit (SDEU) kontra sa suspek.
Sinabi ng pulisya na matapos iabot ni P/Cpl. Globert Batara na umaktong poseur-buyer ang P300 marked money sa suspek kapalit ng isang sachet ng shabu, agad nagbigay ng signal ang pulis sa kanyang mga kabaro.
Gayunman, napansin ng suspek ang papalapit na mga operatiba kaya agad itong naglabas ng baril saka pinaputukan ang mga pulis na gumanti naman ng putok hanggang sa tamaan sa katawan si “Poloy” na nagresulta ng kanyang kamatayan.
Nakumpiska sa nasawing suspek ang isang cal. 45 pistol na kargado ng magazine at limang bala, 10 plastic sachets ng hinihinalang shabu at buy bust money. EVELYN GARCIA
Comments are closed.