“HUWAG kayong mangamba dahil ang ating bakuna ay pinag-aralang mabuti ng ating mga eksperto. Ito ay garantisadong dekalidad, ligtas, at higit sa lahat epektibo at mabubuhay ka. Iyong hindi makabakuna, sigurado patay ‘yun pagdating ng panahon. Eh tigas ng ulo ninyo.”
Ito ang pahayag ng Pangulong Rodrigo Duterte kasunod ang muling panghihimok sa publiko na magpabakuna na kontra COVID-19 makaraang maiulat na kaunti na lamang ang nagpapabakuna at nagpapa-booster shot.
Sa Talk to the People, sinabi ng Pangulo na dapat na makinig ang publiko kay Health Secretary Francisco Duque III.
“Ang masasabi ko sa mga kababayan natin ay makinig kayo kay Dr. Duque. Magpa-booster dose na kayo para ang karagdagang proteksiyon laban sa COVID-19, lalo na sa mga variant nito tulad ng Omicron,” pahayag pa ng Pangulo.
Tiniyak nitong napatunayang ligtas at epektibo ang bakuna.
Ayon sa Pangulo, tiyak na mamatay ang mga indibidwal na hindi magpapabakuna kontra COVID-19.