DWIZ AT PCOO MAGKATUWANG SA PAGLABAN SA COVID-19

NAGING napakahalaga ng ginampanang tungkulin ng  DWIZ 882 sa paglaban sa coronavirus disease 2019 (COVID-19), alinsunod sa corporate slogan na Balitang Sigurado, Tapat na Serbisyo, Sa Komentaryo Numero Uno!

Mula nang tumama  ang pandemya sa kalagitnaan ng buwan  ng Marso, nagkakaloob na ang DWIZ 882  ng hindi lamang mga nagbabagang mga balita at  updates, kundi serbisyo publiko at pamamahagi ng impormasyon  kaugnay sa mga pag-aksiyon at pagsisikap ng pamahalaang nasyunal at lokal upang matugunan ang krisis.

Araw-araw ay isinasahimpapawid ng DWIZ 882 ang ‘Public Briefing: #LagingHanda’  program  ng Presidential Communications Operations Office (PCOO), na layong magkaloob ng mga bagong  balita at    updates kaugnay sa kasalukuyang kaganapan ng bansa  sa paglaban sa COVID-19.

Itinalaga ni D. Edgard A. Cabangon, chairman ng  Aliw Broadcasting Corporation (ABC), ang hookup sa DWIZ 882 at #Laging Handa sa kahili­ngan ni  PCOO Secretary  Martin Andanar, program host. Co-host ni Andanar si PCOO Undersecretary Rocky Ignacio.

Ayon kay Ely Aligora, Aliw Broadcasting executive vice president, nagbigay ng todo suporta ang istasyon  para sa araw-araw na public briefing na isinahimpapawid ilang buwan na. Inilaan ang mga oras na alas-11 ng umaga hanggang alas-12 ng tanghali sa IZ Balita Nationwide para sa araw araw na public briefings ng #Laging  Handa.

Ginawa ring  available ang e-mail, Facebook  at ibang social media sites para sa mga Filipino, ma­ging sa ibayong dagat. Ang programa ay malawak na sinusubaybayan ng overseas Filipino workers (OFWs) at iba pang Filipinos abroad. Kasama rito ang live streaming ng  PCOO sa kanilang Facebook page araw araw. Dahil dito ay maraming nagpapadala ng komento, mensahe at katanungan mula sa mga tagapakinig sa buong mundo kaugnay sa maraming bagay lalo na ang tungkol sa COVID-19.

Bukod sa naiibsan ang kanilang pag-aalala, naipatutupad ng  DWIZ ang paglilingkod sa publiko  sa pagsisilbi bilang help desk mula sa mga katanungan at idinudulog  ng mamamayan  na ipinadadala naman ng istasyon sa mga kinauukulang ahensiya katulad ng Department of Social Welfare and Development (DSWD) and Department of the Interior and Local Government (DILG).

Ang mga ulat  at mga bagong programa  tulad ng Laging Handa ay ini­uulat nang malinaw  sa mga tagapakinig  sa buong bansa  sa pamamagitan ng 50,000-watt transmitter ng DWIZ. Isa ang DWIZ sa iilang AM stations sa  Metro Manila  na nag-tataglay ng  ganitong transmission power.

Mula sa simula pa ay nakinita na ni Aliw Broadcasting founder Ambassador Antonio L. Cabangon Chua ang pagkakataon  ng pinakamalakas na  transmission power  para sa  DWIZ upang mapagsilbihan  ang mas maraming tagapakinig.

Dahil sa  powerful transmission ay naisasabuhay ng DWIZ ang isa pang slogan nitong “Ang Himpilang Todong Lakas.”

Naniniwala ang pamilya ng Ambassador na ang radyo ay ang pinakamahusay na medium para sa komunikasyon at impormas­yon sa paglilingkod sa mamamayan dahil nararating nito ang pinakamalayong komunidad. “He was always for reaching out to the grassroots as a media owner,” pahayag ni G. Johnny Dayang,  isa sa pinakamatagal nang kaibigan  ng  Ambassador na tumulong sa  pagtatayo ng media companies nito.

Base sa pag-aaral, ang  stress at anxiety ay karaniwan sa gitna ng   pandem­yang ito. Kaugnay nito,  ang  DWIZ 882 ay patuloy na magsasahimpapawid ng mga  programa na magpapagaan sa isipan ng mga Filipino sa panahon ng krisis.

May God-centered programs na nakatuon sa spiritual at emotional health ng publiko upang magbigay pag-asa at buhay sa mga pinanghihinaan ng loob.

Dagdag pa rito, patuloy na Ipinakikita sa live streaming ng DWIZ na nasa  Facebook at YouTube ang COVID-19 case updates at ang contact details ng mga ahensiya na  may kaugnayan sa COVID-19 response  –ito ay upang mapalawak ang DWIZ 882’s platform sa pagbibigay ng serbisyo sa publiko.

Bilang pagtatapos, sinabi pa ni Aligora na, hindi na mapigil ang paglawak ng DWIZ 882 at pagpapahusay sa serbisyo nito para sa mga Filipino sa gitna ng pandemya.