EALA SA ITF SEMIS

NAKOPO ni Alex Eala ang kanyang kauna-unahang semifinal berth sa professional tennis ranks makaraang gapiin si French opponent Carole Monnet, 6-7, 7-6, 6-4, sa quarterfinals ng ITF Rafa Nadal Academy World Tour sa Manacor, Spain kahapon.

Bagama’t nasayang ang kalamangan sa first set, nakarekober ang Filipina tennis player at kinuha ang sumunod na dalawang sets upang pataubin si Monnet.

Maagang kinuha ni Eala ang 4-1 lead sa first set.

Gayunman ay humabol si Monnet sa pamamagitan ng apat na sunod na panalo upang kunin ang 5-4 advantage bago nalimitahan si Eala sa huli upang angkinin ang first set.

Bumangon si Eala upang magwagi sa second set bago lumayo sa kalagitnaan ng final set tungo sa panalo.

Bago ang quarterfinal victory ay naitala niya ang pinakamalaking shocker sa torneo nang sibakin si top seed Seone Mendez, 6-4, 6-1, sa Round of 16.