EALA SA ROUND OF 16

PATULOY ang mainit na simula ni Alex Eala sa 2022 US Open girls’ singles tournament sa pag-usad niya sa Round of 16 nitong Martes sa USTA Billie Jean King National Tennis Center sa New York, United States.

Magaan na dinispatsa ng Filipina teen tennis sensation si Nina Vargova ng Slovakia, 6-2, 6-3, sa kanilang second round meeting.

Gumawa si Eala, 17, ng anim na double faults laban kay 16-year-old Vargova, na walang naitalang double faults sa larong tumagal ng 15 minuto.

Bago nakaharap si Vargova, dinispatsa ni Eala si Annabelle Xu ng Canada, 6-3, 6-0, sa opening round noong Linggo.

Target ni Eala ang quarterfinals berth kontra Taylah Preston ng Australia sa third round sa Miyerkoles.

Sisikapin din ni Eala, two-time Grand Slam winner, na mahigitan ang kanyang quarterfinals appearance sa 2021 US Open kung saan nasibak siya kasunod ng Round of 8 loss kay Sebastianna Scilipoti.