PAMPANGA-ARESTADO ang isang dating kasapi ng Philippine National Police (PNP) at apat na iba pa sa ikinasang anti narcotics operation ng mga ahente ng Philippine Drug Enforcement Agency (PDEA) sa Angeles City sa lalawigang ito.
Sa ulat na isinumite kay PDEA Director General Wilkins Villanueva ni PDEA Central Luzon Dir. Christian Frivaldo, nakumpiska sa operasyon ang P240,000 halaga ng liquid shabu na nakalagay sa tatlong botelya at 60 gramo ng Kush o high-grade marijuana na tinatayang nasa mahigit P220,000 ang halaga.
Nasakote ang mga suspek na nakilalang sina Frederick Torres, isang dating pulis; Jay Angeles Nugid, 43-anyos; Jennifer Nugid, 27-anyos; Arlene Campos, 40-anyos at Rona Tabuena, 19-anyos.
Ikinasa ang buy bust operation ng PDEA3 – Pampanga Provincial Office at RSEt sa Nouveau Residence sa Barangay Pulong Cucutud na kung saan nakuha rin sa pag-iingat ng mga suspek ang ilang drug paraphernalias.
Nahaharap ang mga suspek sa kasong paglabag sa Comprehensive Dangerous Drugs Act of 2002. VERLIN RUIZ
Comments are closed.