FACEBOOK, LAZADA AT SHOPPEE BINALAAN SA PAGBEBENTA NG SMS BLASTING DEVICE

NAGBABALA ang National Telecommunication Commission (NTC) na mahigpit na ipinagbabawal ngayon ang pagbebenta o pag-angkat ng SMS blasting device, ang aparato na sinasabing ginamit sa pananabotahe kay Partido Federal ng Pilipinas Standard bearer Ferdinand ‘Bongbong’ Marcos, Jr.

Inatasan ang Facebook, Lazada at Shopee, na huwag nang magbenta ng SMS blasting devices.

“The NTC has not authorized the importation, manufacture, sale/distribution, or type approval of the above-mentioned equipment,” ayon sa abiso ng NTC.

Dahil dito ay nagpalabas ng cease-and-desist order sa tatlong nabanggit na e-commerce platforms at sila ay pinahaharap sa komisyon sa Oktubre 27.

Paliwanag pa ng ahensiya, ang pagbebenta ng SMS blaster machines at mga katulad na gamit ay maaring paglabag sa Radio Control Law, gayundin sa NTC MO 01-02-2013 na nagbabawal sa portable cellular mobile repeater at portable cellsite equipment.

Una nang sinabi ng NTC na iniimbestigahan na ang pagpapadala ng emergency text alert na sinasabing pagkampaniya kay dating Sen. Bongbong Marcos nang maghain ito ng kanyang certificate of candidacy (COC) para tumakbo sa presidential race noong nakaraang linggo.

Giit ng kampo ng pambato ng Partido Federal ng Pilipinas (PFP) sa pagkapangulo, malinaw na pananabotahe ang pakay ng text alerts at wala silang kinalaman dito.

Panawagan ng kampo ni Marcos, isang malalimang pagsisiyasat sa anila’y malinaw na pananabotahe sa dating senador.

Anila, hindi dapat palagpasin ng Comelec, NTC at Department of Information and Communications Technology (DICT) ang pananabotahe at paggamit sa text blast messaging services na dapat sana’y ginagamit lamang para magpalabas ng babala kaugnay ng isang kalamidad o delubyo.
VERLIN RUIZ

Related posts:

1.5 BILYONG PEKENG ACCOUNTS KAMPANYA BAWAL SA FACEBOOK 3.2-B FAKE ACCOUNTS SA FB DINELETE PEKENG FB ACCOUNTS INIIMBESTIGAHAN NA DUMMY ACCOUNTS SA FB BUBUSISIIN AKSIYON NG FACEBOOK IGINAGALANG NG MALAKANYANG