FULLY VACCINATED SA MUNTI NASA 44% PA LANG

INIHAYAG ng lokal na pamahalaan ng Muntinlupa na nasa 44 porsiyento pa lang nang kanilang target population ang fully vaccinated .

Base sa report ng Muntinlupa City COVID-19 Vaccination Program (MunCoVac), umabot na sa 169,444 indibidwal ang fully vaccinated na may katumbas na 43.9 porsiyento ng kanilang target population na 385,725 indibidwal.

Ang target population sa pagbabakuna sa lungsod ay 70 porsiyento ng kanilang kabuuang populasyon na 551,036 indibidwal.

Nabatid na nasa 318,647 indibidwal ang napagkalooban na ng unang dose ng bakuna na katumbas ng 82.6 porsiyento ng kanilang target population kabilang ang 11,404 indibidwal na nabakunahan sa vaccination sites ng mga pribadong kumpanya sa lungsod.

Napag-alaman naman sa MunCoVac na ang nagamit nang bakuna na naiturok sa mga indibidwal hanggang sa kasalukuyan ay umabot na din sa 483,732 vaccines.

Ang mayroong pinakamataas na porsiyento ng vaccination rate o ang mga nakatanggap ng unang dose ng bakuna ay pinangunahan ng Barangay Buli na may 107%; Barangay Cupang, 97%; Barangay Ayala-Alabang, 96%; Barangay Alabang, 93%; Barangay Tunasan, 82%; Barangay Sucat, 76%; Barangay Bayanan, 71%; Barangay Putatan, 69%; at Barangay Poblacion na mayroong 53 porsiyento ng vaccination rate.

Sa kategorya naman ng mga fully vaccinated population ay nanguna ang Barangay Ayala-Alabang na mayroong 70 porsiyento; Barangay Cupang, 58%; Barangay Alabang, 47%; Baranagya Tunasan, 41%; Barangay Sucat, 40%; Barangay Buli, 36%; Barangay Putatan, 34%; Barangay Bayanan, 31%; at Barangay Poblacion na mayroong 24 porsiyento.

Dagdag pa ng MunCoVac na makikita din sa data na ang mga hindi pa bakunadong mga indibidwal sa lungsod na mayroong 65 porsiyento ang kasalukuyang mayroong aktibong kaso ng CO­VID-19 cases sa lungsod. MARIVIC FERNANDEZ